لمْدينهْ رايْ بمّاليها

سامحني كلمة نغنّيها *** لمْدينهْ رايْ بمّاليها

إذا فلْحت راهو إحنا *** إذا سقْطت راهو إحنا

وما تتْعجبْش من المحنهْ *** إنت إلّي رفضْت اتداويها

سامحني كلمة نغنّيها *** لمْدينهْ رايْ بمّاليها

ما تقولشْ أنا خاطيني *** سيّبني وبرّا يزّيني

ما يخْطاكش تخرنيني *** حتّى تنهضْ بينا وبيها

سامحني كلمة نغنّيها *** لمْدينهْ رايْ بمّاليها

نحْلمْ في اليقْظة والنّومْ *** بمْدينة مثْل المشْموم

ْريحتْها تشفي المهموم *** حتّى مدينة ما تْساويها

سامحني كلمة نغنّيها *** لمْدينهْ رايْ بمّاليها

يا خرافةْ ألفين وتسعةْ *** خايف عليك من الفصْعةْ

ماسمعناشي بواحدْ يسعى *** غيرْ اللجنة إلّي تراعيها

سامحني كلمة نغنّيها *** لمْدينهْ رايْ بمّاليها

وين هوما أصحاب المالْ *** أمّالي خبْرة وأعْمال

راهو ما يتْسوّى الحال *** إلاّ إذا عْنيتو بيها

سامحني كلمة نغنّيها *** لمْدينهْ رايْ بمّاليها

لا تقلّي جلاصْ وبلْدية *** لا تقلي غرب وشرقيّة

هي ليكْ وهيّ ليّ *** ما دمت بدمّك تفديها

سامحني كلمة نغنّيها *** لمْدينهْ رايْ بمّاليها