حكاية قيروانية

نحكيلكم حكاية على جوّ القروي وتفدليكو.. حكاية فرشكة وصحيحة.. برة يا سيدي يا بن سيدي فمّة راجل ومرا.. الراجل لاباس عليه دولة كيما نقولوا في القيروان.. والمرا بنية صغيرة أصغر منو وبنت عائلة شريفة أما موش دولة.. حاجّة رغم صغر سنها وراجلها وين نحطك يا طبق الورد.. في ليلة ساهرين كاس تاي باللوز وشوية بانان ـ وبيناتنا كلمة بانان كلمة عربية قحّة خذاوها علينا لفرانسيس ولنقليزـ التلفزة ليلتها مقيّنة سألها قاللها هيّا نتمناو ونقولو أشنية أعز أمنية عند كل واحد منّا قتلو أيّا برّا أبدا إنت قال إلّي يتمناه وتلفتلها وقاللها : إيه وإنت أش تتمنّى؟ قاتلو أنا ما نقول إلا ما تحلف إلّي تحققلي أمنيتي.. الرّجل ماو قلنا دولة قال في قلبو : تي أش باش تتمنّى هي؟ صياغة؟ نشريلها.. عمرة؟ مافيها باس.. دار باسمها؟ موش مشكلة. أيا حلف بالله إلّي تتمناه يلبيهولها.. يا سيدي لمرا وخّرت وقدّمت وقاتلو نحبك تهزني نعمل دورة في هاك لبلاصة .. اشنية لبلاصة قاللها؟ قاتلو أنت تعرف أش نقصد وراك حلفت بالله كونك تلبيلي أمنيتي.. الراجل دخل بعضو ولد فلان الفلاني يهز مرتو لهاك لبلاصة تي هو بيدو عمرو مادخلها... لحلح بيها : يا بنتي نشريلك سانية.. نهديلك دار.. نكتبلك حانوت.. صياغة.. فرادي.. وهي تدكك عليه وتقلو هاك لبلاصة.. هي بيناتنا تربي فيه على خاطر ديما حاسب روحو فرنك وأربعة وينجم يجيب الصيد من وذنو وإش يا ذبانة ما فمّة في الدنيا كان أنا... من غدوة سي الدولة سأل شيخ في المصيبة إلي هبطت عليه... وصام ثلاثة أيام كفارة يمين وتصدق على برشة مومنين وحكايتنا طابة طابة والعام الجاي تجينا صابة